找回密碼
 立即註冊
「阿蕭提攜梁立人做編劇」的謬誤

也談過去香港電視種種(和應Myradio節目,及元憶錄,等等)

聽譚志強26號晚講梁立人,話係阿蕭提攜梁立人做編劇,錯哂,仲錯得好離譜。

梁立人做編劇的資歴早阿蕭好多兼完整:

●梁立人係無線演員訓練班出身,好似係甘國亮個屆。1972年左右。

●梁立人在港台寫”小時候, 獅子山下”出名,師父係港台黄華麒。

●阿蕭當時應該係無線做news reader,無人識佢,梁立人己是一名名編劇。

●1975年,梁立人隨黄華麒入ICAC,寫「亷政風暴」。

●阿蕭隨何掌邦轉投RTV,仲係news reader,認識了麥當雄。

●1976年,梁立人隨黄華麒做電影編劇:「她的媽的爸爸的」,阿蕭仲未正式入行(指創作界)。後兼職同阿麥度野,後來正式做阿麥的策劃。RTV當時有四組(製作經理):麗的三雄+鄒世孝。當時RTV製作總監係梁偉民。

●1977年,梁偉民請梁立人做RTV編劇部經理,地位高過阿麥,當時阿蕭只係阿麥軍師。

●同年,佳視倒閉,阿麥升為RTV製作總監,阿蕭升為策劃部經理,與梁立人同級。但梁立人是舊人,無哂權力。

●當時係人都知,梁立人係阿麥唔妥之人。阿蕭同梁立人當時關係如何,不知。但二人之前無淵源。

(之後二人同在邵氏工作過)

譚志強話係阿蕭提梁立人做編劇,真係牛頭不搭馬咀。

(注,我唔係同梁立人講話,但譚志強錯得太離譜)



>>你知香港可能有很多紅衛兵,能揭破一兩個是件快事。<<

我不熟識梁立人,他是游水下來的,照年份看(早逃亡),不像是,紅衛兵不會在前期偷渡的。

我以為,香港人當紅衛兵是洪水猛獸,是一種無知。當時全國有幾千萬紅衛兵。紅衛兵是時代的犧牲品,你怎可以用喪屍的心情看他們?五六十歲的人怎可以以他十多歲時參加過什麼運動來判定?

梁立人的文章我一篇都沒看過。他今天反動是另一回事。譚志強岐視紅衛兵,不好。

我夠胆夠膽向天發誓,我一點也沒有妒忌過蕭若元!ok!大家唔同路數,佢唔係writer。佢一早走高層,我係基層,况且我好早就改行,我使乜妒忌佢,等佢可以用手寫出一個劇本,才可以談這個問題。蕭若元頭腦好是公認,這一點我是佩服的,但同妒忌無關。霍金夠好頭腦,妒忌得幾多。

蕭若元本人在網上是好謙虛的,人們無心說錯他的資料,不是乜野大事。我提出反証資料是幫手拆彈。擦鞋仔扭去陰謀論,是陷蕭和譚於不義。我點樣想唔會改變「梁立人唔係由阿蕭阿蕭提做編劇」的事實(况且我在此事沒有眨低誰),咁簡單嘅道理都唔知?

我就係一個舊ATV人咁簡單!我夠胆向天發左誓,你點反應?

-----------------------------------------------------------------------------------------------------------------

>>假如糖心風暴劇本由蕭若元寫............

肯定去到好盡,結局一定出人意表(可能奸人當道)。現大結局太平淡無味。念蕭公子,朝朝外景車塞滿廣播道.

千帆並舉,問誰領風騷!!!!!!!! <<


有無人知道蕭若元可能根本未寫過劇本?

有無人知道蕭若元可能根本未寫過劇本?所以賭精呢一句有語病。電視舊行家都知道,麥當雄唔識寫劇本,而蕭若元更加唔識寫劇本,兩個都係”度劇本”高手,而唔係writer。(以出街計,阿簫有冇寫過其他,唔知)

講下歷史,1977年左右阿麦做左ATV一台台長之後,揸哂全台大權,蕭若元任策劃部經理,梁立人任編劇部經理,阿麦下面有三組戲劇組,阿麦自兼一組,蕭若元做佢左右手,兼一組策劃(即度野佬) 。

1977年阿麦做台長之後,一組的編劇會議成員及分工是這樣:

●麦當雄組(天蠶變、天龍訣等)

第一個round(故事及大分場)

(A)麥當雄-----一台台長(controller)兼太上監制。話哂事,與蕭若元拍檔度故事,度分場。二人互補。

(B)蕭若元----策劃部經理(programme planning manager) 兼該劇策劃。是麥當雄軍師,睇住一組的故事及分場,但唔會落手寫劇本。大概亦唔識寫,寫野同度野係兩回事。(寫劇本要識D电視制作技巧)

(C)監制(excutive producer)------第一個round大分場,得個知字,無須發言。亦不用全程開會。

(D)劇本編審(script supervisor)----理論上負責改稿,麥當雄同蕭若元在場,應該無声出。

(E)編劇(script writer)----最惨個個,入工最低個個,最後要出制成品(劇本)個個。

第二個round(細分場)

(F)理論上係編劇收到分段故事後,寫出第一稿分場俾班大佬係会上插,定好細分場後,返屋企寫出第一稿劇本(對白本)。

(G)當年我唔係阿麥個一組,唔知作為策劃部經理的簫若元有無落手寫第一稿分場上板被人插,估計無。

(H)做為策劃部經理以及麥當雄軍師的阿蕭唔會先出手的,寫第一稿分場被人上板討論及修改咪好冇面?

(I)其他組亦先由編劇聽完故事後寫第一稿分場。阿蕭的貢献大概是故事分段方面。

第三個round(傾第一稿劇本)(每個round編劇寫出兩集或三集劇本)

(k)叫做改第一稿劇本會議,揸弗的是該劇監制,參與討論的是該round的編導(producer),編審則會全程參與,做全劇連貫工作及改稿。估計呢個階段阿蕭無参與。係都是check下。

第四個round(傾第二稿劇本-----定稿)

(L)呢個階段由該round的編導揸弗,因為由佢拍攝,編審同佢撑,然後改。估計呢個階段阿蕭無参與。

●其他組如鄒世孝組和李兆熊組(manager級) 的project,台長麦同策劃部經理的簫若元只會審閱其故事大綱,無可能參加他們故事創作及分場會議,基本上唔用組,亦無咁多時間。

不厭其煩講出當年ATV編劇流程,係想指出:

(1) 編劇係咁樣分工,一組劇的創作組起瑪係1編審+1策劃+4編劇,阿簫唔係一个寫手(即編劇),而係一亇度野佬(以策劃部經理兼一組的策劃) ,無疑係高層,但無人會叫佢做編劇,而度野的地位又唔及阿麦高。估唔到廿幾年後,ATV的劇本好似由佢一個人寫哂咁。

(2) 就算唔計寫劇本呢個工序,係度野呢個過程,阿蕭係咪做哂所有野?而家可以問下阿蕭,寫過幾多個第一稿分場?睇過幾多個編劇出的劇本,佢話負責過800集劇本,問下佢由頭到尾睇過幾集?一仗功成萬骨枯,我想同當年D編劇仔講下野。

(3) 當年有三組(另一組係綜合節目組,亦由阿麦阿簫管埋,可見分身不暇) ,鄒世孝組和李兆熊組D劇本唔係由阿麦阿簫度的,阿簫今日講”出”左ATV 800集劇本,唔知包不包括呢兩組,如果包括埋,就係貪功。

唔係有心踩阿蕭,娛樂圈都係咁,講舊時都係認叻,個個高佬森甚至出碟話當年”變色龍”劇本係佢一個人寫哂,講大話唔使本,為乜呢?

當年一个編劇一個月寫兩個劇本己經好巴閉(即兩個SHOW),因為又要開會又要寫第二稿。記得阿蕭以前話出過800集劇本,如果係編劇寫出來,需要33年的時間。度野佬同寫手的分別是,度野佬唔使worry對白。寫對白本需要很多時間。

講返唔係有心踩阿蕭,今日阿簫標榜才子,又讀過一定歷史,應該專重歷史,阿蕭當年一出道就是大將,今日唔使搶哂當日卒仔D功勞,尤其重要的,唔好歪曲左香港电視創作史的歷史面貌。

阿簫唔知記唔記得,當年的創作模式係”集體創作”,ATV當年的編劇部有五六十人,唔通佢地係幽靈?有風度D好!多多得罪,再見!



分享至 : QQ空间
收藏
INSAFE System
關閉

0 個回復

您需要登錄後才可以回帖 登錄 | 立即註冊